Увесь дзень 23 студзеня сілавікі праводзілі рэйды па сем’ях экс-палітвязняў і родных тых, хто сядзіць за палітыку. Сузаснавальнік BYSOL Андрэй Стрыжак і прадстаўніца Аб’яднанага пераходнага кабінета па сацыяльных пытаннях Вольга Гарбунова выказаліся пра тое, з чым могуць быць звязаныя масавыя ператрусы і затрыманні і чаму яны праходзяць менавіта цяпер.
«Сённяшняя атака праводзіцца для выяўлення тых, хто атрымліваў дапамогу ад BYSOL і іншых структур»
Сузаснавальнік BYSOL Андрэй Стрыжак мяркуе, што кібератакі, якія ў панядзелак закранулі іх сайт і аплатную сістэму, а таксама масавыя скаргі на іх сацсеткі, сацсеткі праекта «Палітвязынка», Святланы Ціханоўскай і рэйды ў аўторак — гэта «добра арганізаваная атака з боку сілавікоў».
— Сёння сілавікі запусцілі інфармацыю пра тое, што яны нібыта атрымалі доступ да нашых базаў, спрабуючы такім чынам сарваць давер да сэрвісу, — кажа Андрэй Стрыжак. — Але, адразу мушу сказаць, ні да якіх нашых базаў ніякіх доступаў у іх няма. Табліца, якую яны паказалі, злепленая на каленцы і не мае нічога агульнага з тымі, якімі карыстаемся мы.
На думку суразмоўцы, абставіны двух апошніх дзён складваюцца ў «адну карціну» і сведчаць пра тое, што ўлада разумее: яна не ў стане спыніць салідарнасць. Людзі як данацілі, так і данацяць, адзначае Стрыжак. А таксама ўспамінае «Марафон салідарнасці», калі за два дні беларусы сабралі больш за 570 тысяч еўра.
— Тады яны (сілавікі. — Заўв. рэд.) зайшлі з іншага боку і цяпер спрабуюць «вырубіць» атрымальнікаў дапамогі, якія знаходзяцца ўнутры краіны. Імкнуцца паказаць, што гэта небяспечна для іх, прымусіць людзей адмовіцца прымаць падтрымку, — дзеліцца меркаваннем Андрэй Стрыжак. — Сённяшняя атака праводзіцца для выяўлення тых, хто атрымліваў дапамогу ад BYSOL і іншых структур. Сілавікі шукаюць перапіскі і любыя дакументальныя пацверджанні гэтаму.
Паводле суразмоўцы, у некаторых з тых, да каго сёння прыйшлі, канфіскоўвалі тэхніку.
— Думаю, гэта чарговая масавая гісторыя ў выбарны год. Сілавікі зноў спрабуюць стварыць нейкую рэальнасць: прыдумляюць змовы, нейкія сеткі і іншае, каб прадэманстраваць, што яны добра працуюць, і паказаць сваю эфектыўнасць. Такое маё тлумачэнне, чаму гэта адбываецца менавіта цяпер і так масава, — працягвае Стрыжак. — Я, у прынцыпе, у сваіх прагнозах і раней казаў, што 2024-ы — гэта будзе год, калі мы ўбачым масавыя [крымінальныя] справы і атакі, бо сілавікі не могуць не паказаць сваю працу ў выбарны год.
«Цынічна пераследаваць за атрыманне дапамогі тых, хто і так беззаконна асуджаны»
— Мы яшчэ дакладна не ведаем, ці сапраўды затрыманні звязаныя з тым, што палітзняволеным і іх сваякам аказвалася дапамога ад праваабарончых арганізацый і салідарных беларусаў і беларусак. Але калі гэта праўда, не магу гэта назваць іначай, як цынізмам, — заявіла Вольга Гарбунова. — Бо цынічна пераследаваць за атрыманне дапамогі тых, хто і так беззаконна асуджаны. Гэта як «біць ляжачага нагой», што, на жаль, звычайная практыка прадстаўнікоў «праваахоўных органаў» пры гэтым рэжыме.
— Мы назіраем чарговую хвалю ператрусаў і масавых затрыманняў у Беларусі. Бандыты рэжыму нападаюць на былых палітычных зняволеных і сем'і тых, хто цяпер знаходзіцца пад вартай, — напісала ў сацсетцы Х Святлана Ціханоўская. — Прынамсі 24 чалавекі былі затрыманыя. Сёння ніхто ў нашай краіне не можа адчуваць сябе ў бяспецы.
— Салідарнасць крыецца не пад шыльдамі BYSOL ці INeedHelpBY. Хоць нехта вельмі крыўдлівы і помслівы не стамляецца наносіць свежыя раны кожны дзень, палітзняволеным дапамагае велізарная колькасць людзей у Беларусі і па-за яе межамі, — адзначае прадстаўніца Аб’яднанага пераходнага кабінета па сацыяльных пытаннях. — Салідарнасць выратавала многія народы Еўропы: Польшча ў 1980-х — самы блізкі да нас прыклад. Мы, беларусы і беларускі, таксама абавязкова пераадолеем гэтую варожую навалу сілай салідарнасці.
Вольга Гарбунова заклікала беларусаў не пераставаць дапамагаць адно аднаму, але быць пры гэтым асцярожнымі і прытрымлівацца правіл лічбавай бяспекі.
Паводле звестак праваабарончага цэнтра «Вясна», падчас сённяшняга масавага рэйду сілавікоў пад рэпрэсіі трапілі як мінімум 84 чалавекі. Частку з іх затрымалі, некаторых пасля ператрусаў адпусцілі. Вядома, што ў людзей бралі падпіскі пра неразгалошванне, адзначаюць праваабаронцы.