У аўторак, 23 студзеня, з самай раніцы па ўсёй краіне сілавікі прыходзяць да некаторых экс-палітвязняў, што засталіся ў Беларусі, а таксама да родных тых, хто асуджаны за палітыку. Паводле звестак праваабаронцаў, да 18.00 сілавікі прыйшлі мінімум да 60 беларусаў. Затрыманая жонка палітвязня Мікалая Статкевіча Марына Адамовіч.
Тэлеграм-канал праваабарончага цэнтра «Вясна» паведамляе, што ператрусы праходзяць па ўсёй краіне. Кагосьці з тых, да каго прыйшлі сілавікі, затрымалі, у кагосьці правялі ператрус і адпусцілі. Паводле звестак праваабаронцаў, увечары 23 студзеня ператрусы ўсё яшчэ працягваюцца.
Праект dissident.by паведамляе пра затрыманне жонкі палітвязня Мікалая Статкевіча Марыны Адамовіч. Як нам стала вядома, сілавікі адвезлі яе ў Заводскі РУУС. Адтуль жанчына дадому не вярнулася.
Таксама з ператрусам супрацоўнікі КДБ прыйшлі і да мамы стваральніцы Dissidentby Марыны Касінеравай. Ператрус доўжыўся з 8.00 да 18.00. З якой крымінальнай справай звязаны прыход сілавікоў, невядома.
Да гэтага праваабаронцы паведамлялі пра затрыманне 76-гадовага вядомага віцебскага актывіста Барыса Хамайды. Прычына таксама не вядомая.
Нагадаем, першым пра ператрусы заявіў сузаснавальнік BYSOL Андрэй Стрыжак. Паводле яго інфармацыі, да экс-палітвязняў і родных палітвязняў з раніцы 23 студзеня пачалі прыходзіць супрацоўнікі КДБ.
Адна з крыніц «Люстэрка» расказала, што сярод тых, да каго сёння прыйшлі няпрошаныя госці, былі людзі, якія ўдзельнічалі ў адным з закрытых чатаў, дзе родныя палітвязняў і экс-палітвязні абмяркоўвалі бытавыя пытанні. Паводле крыніцы, асабліва цікавіліся тымі, хто ў чаце пісаў пра дапамогу BYSOL.
Праваабаронцы паведамляюць, што ў пастановах сілавікоў фігуруюць артыкулы за «фінансаванне» і «ўдзел у экстрэмісцкіх фарміраваннях».
Імаверна, сённяшні рэйд звязаны з сітуацыяй вакол праекта INeedHelpBY, які дапамагаў прадуктамі пацярпелым ад палітычных рэпрэсій. 16 студзеня КДБ прызнаў ініцыятыву экстрэмісцкім фарміраваннем.
Паводле інфармацыі праваабаронцаў, некаторым з затрыманых самі сілавікі казалі, што прыйшлі да іх праз дапамогу ад INeedHelpBY. Пра гэта ж «Люстэрку» заявіла крыніца. Паводле яе звестак, адна з сем’яў, да якой прыходзілі сілавікі, шмат месяцаў таму атрымлівала прадукты з дапамогай гэтай ініцыятывы.
Чытайце таксама